Саха Республикатын Национальнай библиотекатын кыраайы үөрэтэр отделыгар Сахабыт сирин айар талааннаахтарын билиһиннэрэр “Алаас уран тарбахтаахтара” диэн ааттаах бырайыак үлэлээбитэ иккис сыла.
Бу бэртээхэй бырайыак координаторынан педагог -маастар, норуот маастара, Саха Республикатын культуратын туйгуна Л.П.Жиркова буолар.
Күһүн манна “Оҕуруо ойууларым” диэн норуот уус-уран оҥоһуктарын маастара, ытык Таатта сириттэн төрүттээх А.Н.Голикова үлэлэрин быыстапката турда.
Айталина Наримановна туспа суоллаах-иистээх, ураты көрүүлээх буочарынан тикпит, оҕуруо киэргэллээх чаппараах улахан набордара, дьахтар симэхтэрэ, суумкалара, дэйбиирдэрэ библиотека бу саалатыгар сылдьар дьон улахан болҕомтотун тартылар.