Билигин социальнай ситимнэр сайданнар хас биирдии киһи, ордук ыччаттар олохторугар ситиһиилэрин инстаграмҥа, Тик Токка, ютубка о.д.а көрдөрөр буоллулар.
Урут бары сэбиэскэй саҕана өктөбүрүөнэк, пиэньиэр, хомсомуол буолан улахан дьонтон, оскуолаттан, тэрилтэттэн хайҕал суруктары тутар эбит буоллахпытына, билигин үгүстэр биир халыып лайктааһыҥҥа наадыйаллар.
Ким төһө элбэх лайктааҕынан, сурутааччылааҕынан кини ситиһиитэ сыаналанар буолла. Лайктааһынынан ким эрэ куонкуруска кыайар, ким эрэ элбэх сурутааччыланан үөрэр-көтөр.
Ону сэргэ билэр да, билбэт да дьоҥҥун хайа баҕарар социальнай ситимнэртэн булан кини тугу сөбүлүүрүн, кимниин доҕордоһорун, туох интэриэстээҕин уо.д.а билиэххин сөп.